DAVAO DEL NORTE — Adunay kinatibuk-ang 2,644 ka mga tinun-an sa kolehiyo sa probinsya ang nakadawat ug scholarship grant ubos sa CHED-UniFAST Tulong Dunong Program (TDP) pinaagi sa hiniusang paningkamot ni Bise Gobernador De Carlo “Oyo” L. Uy ug Congressman Alan “Aldu” R. Dujali.
Mikabat sa P30.8 milyones ang naapod sa mga benepisyaryo nga gikan sa nagkalain-laing eskwelahan sa Panabo City lakip na ang Aces Polytechnic College, Davao del Norte State College, North Davao Colleges, Northlink Technological College, ug UM Panabo College; ug sa Kapalong lakip na ang Santo Tomas College of Agriculture, Sciences and Technology, Davao Winchester Colleges, ug Kapalong College of Agriculture, Sciences and Technology.
Ang TDP usa ka scholarship program sa Commission on Higher Education (CHED) nga gi-implementar sa Unified Student Financial Assistance System for Tertiary Education (UniFAST), tumong niini nga matabangan ang mga gusto mupadayon sa kolehiyo apan walay kakayahan ang ilang mga ginikanan, lakip na diri ang mga 4Ps beneficiaries.
Ang maong tapok kabahin sa Scholarship Program, Educational Assistance, Knowledge and Skills-Training (SPEAKS) program ni Vice Governor Uy ug ang Special Education Program ni Cong. Dujali alang sa mga kabatan-onan sa Davao del Norte.
Anaa usab sa maong kalihokan sila Atty. Ryan L. Estevez ang Executive Director sa UniFAST, ug si Maricar R. Casquejo ang Director sa CHED RO XI.
Gikalipay sa mga benepisyaryo ug sa ilang mga ginikanan ang maong tabang gikan sa gobyerno ug mapasalamaton sila sa inisyatiba sa mga lideres sa probinsya.(PR)
