Tulo ang patay samtang duha ang angol sa pag-silbi unta sa warrant of arrest batok sa duha ka mga wanted sa kasong murder sulod sa Camella Trails Subdivision, Visayan Village, Tagum City kagabii Enero 31, 2025.
Sa report gikan sa Tagum PNP pinaagi ni Chief of Police PLTCOL Wildemar Tiu nga ang grupo sa PIU DNPPO, SWAT, 1st DNMFC,Tagum PNp ug mga personahe sa RID PIT DPPO milusad og joint operation aron i-serve ang warrant of arrest batok nila Norman Saquin ug Rozendel Arselias Cañete sa two counts of murder.
Sumala pa nga dihang miabot na sa giokupa nga subdivision unit ang mga pulis para masilbi ang warrant of arrests ang mga dakponon namusil hinoon kini.
Sa engkwentro nasamdan sa iyang bukton si PSSg Evan S Tapayan ug sa iyang tiil si PCpl Jayson D Baliad pulos mga sakop sa SWAT Team ug pulos na kini luwas ang kondisyon.
Ang suspek nga si Rozendel Arsellias Cañete ug wala mailhing Lalaki nga kauban ang nanagan samtang si Norman Saquin mipaingon sa iyang kwarto sa second floor ug nakigpinusilay kini sa mga pulis.
Nasamdan si Saquin ug nadala pa sa Davao Regional Medical Center (DRMC) apan gideklara nga dead on arrival sa attending physician.
Napatay pud sa mga operatiba ang suspek nga si Rozendel Cañete sa bakanteng lote nga iyang gidaganan nga nakigpinusilay pud sa mga operatiba.
Ang laing kauban nila nga mitago sa creek ug dugay nakit-an nga nailhang si Renz Balmaceda ang namusil pud ngadto sa modakop kaniya nga mga pulis ang napatay pud sa nahimong pagbalos sa mga otoridad.
Tungod sa maong insidente halos ka lima oras walay gipasulod ug gipagawas nga mga residente sa maong exclusive subdivision tungod sa peligro samtang nagpadayon ang operasyon sa mga pulis.
